Boodskap vir Vandag

Search
Close this search box.
Search

Net ’n asem lank

Lees Psalm 39.

Kyk, U het bepaal dat my dae min sal wees, in u oë is my lewensduur byna niks. Ag, alle mense is maar verganklik (v 6).

Here, “verganklikheid” het toe
’n deel van my woordeskat geword.
Teësinnig – en doodnuuskierig – leen ek deesdae
my ore uit aan praatjies oor dié een
wat so skielik siek geword het en dáárdie een
wat dit nie veel langer gaan maak nie.

Ek was nog besig om my lewe in orde te kry
– my doen en late, my swye en my prate –
en ek het my pas voorgeneem om liefs te swyg,
veral in twyfelagtige geselskap,
en …

En toe oorval die nare gedoente my,
dié doodgaanpraatjies.
Sedertdien kan ek nie ophou om daaroor te dink nie.
Daarom het ek gedink om U te vra:
Wat weet U wat ek nie weet nie?
Wat weet U van mý tyd?
My lewe wat net ’n skaduwee is,
wat wag op u lig?

Ag, Here, ek moet dit weet,
sodat ek my sake in orde kan kry – wié kry wát,
en so meer, U weet? – en my kan voorberei
op die ergste.

Daar is ook nog die ding van al my skuld,
wat ek glo eers met U moet uitklaar.

Ek besef dat U my te eniger tyd kan kom haal
– die lewe is immers net ’n asem lank –
en dit is nie dat ek onwillig is om te gaan nie, Here.
Ek dink wel ek het nog ’n bietjie tyd nodig.
Ja, ek hoop U los my nog ’n rukkie hier, Here.
Ignoreer dan voorlopig my verganklikheid, asseblief.
Totdat die geskikte tyd daarvoor kom,
die jare van onbehae aanbreek.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.