Boodskap vir Vandag

Search
Close this search box.
Search

’n Lewenslied

Lees Psalm 40:1-6.

Hy het my ’n nuwe lied in die mond gelê, ’n loflied vir ons God. Baie sal daarvan hoor en Hom die eer toebring, hulle sal op die Here vertrou! (v 4).

Ek kan nou nog nie glo dat dinge
toe só afgeloop het nie, Here.
Om te dink dat ek besig was om bes te gee …
Ek was in die diepste gat denkbaar.
Donker, skrikwekkend, met geen uitkomkans nie.
En toe roep ek, óp.
Na bo.

Toe buk U af en haal my uit.
So eenvoudig soos dit.
So buitengewoon soos dit.

En toe … maak U dinge reg.
U gee weer rigting aan my lewe.
Ek sukkel steeds om dit te glo:
vanuit die taaiste modder tot op die stewigste gelykpad –
met één hou! Net U kan dít regkry.

Here, as ek nou terugdink aan hoe diepverlore
ek regtig was, hoe uitsigloos, hoe absoluut onredbaar …
Maar toe gryp U in
en gryp my vas.

Ek was so oorstelp dat ek, toe die ergste moegheid oor was,
na maniere gesoek het om vir U dankie te sê.
Al waaraan ek kon dink, was om vir U iets te sing,
en ek het ál die “Prys die Heer”-liedere wat ek ken, deurgesing.
Maar, het ek ook gedink, miskien vra hiérdie dankbaarheid
’n nuwe lied, wat iets van die hele storie sal vasvang en vertel.

Ek het toe nuwe woorde gesoek,
selfs ’n wysie probeer uittokkel.
Later moed opgegee.

En toe leer Ú my die lied wat pas –
’n wysie sonder weerga, woorde sonder einde:
’n lewenslied vol dankbaarheid.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.