Boodskap vir Vandag

Search
Close this search box.
Search

U huis

Lees Psalm 65:1-5.

Dit gaan goed met die mens vir wie U uitkies en laat naderkom om in u tempel te bly. Laat ons die goeie dinge in u huis in oorvloed geniet, die goeie dinge in u heilige woning (v 5).

Here, ek weet dit is onmoontlik om U vas te pen.
Om U te probeer inkamp, is belaglik.
Die blote gedagte daaraan te gek vir woorde.

U heerskappy strek oor u heelal.
U heilige teenwoordigheid is te sien
in talle wonderbaarlike verskynings –
en is volledig verberg. Soos U dit wil.

Durf ek dan maar sê, Here, dat die enigste plek
waar ek my iets van U kan indink, ’n gebou is?
“Die Here se huis” word dit soms genoem –
dié vier mure teen die wêreld se skraal wind.
Daar bevind ek my meermale in my weerlose dae –
tye wanneer siekte en dood en vrees en halsstarrige
bygeloof my besoek. Wanneer hulle saamspan
met sondeskuld en kom nesskop in my blootgesteldheid.

Dan vlug ek daarheen, Here –
na u huis, by voorbaat uitasem. Vervaard hardloop ek
en kry halsoorkop my sit. My hoof buig asof vanself
in ’n gebaar wat veel meer as ’n gewoonte geword het.
Nou is dit ’n stille erkenning van hierdie heilige grond.

Dan praat ek.

Eintlik gebeur dit só:
Daar maal só ’n klomp stemme in my kop
dat ek hulle eers moet stil luister.
En dan, nadat hulle uitgewoed is,
begin ék praat – saggies, prewelend,
dalk ’n bietjie onsamehangend ook.

Maar U hoor my goed. Want U wat oral is,
is ook hier in dié huis waar ek tuisgekom het.
U plek is my plek. Hier gaan sit ek gemaklik.
En deesdae gereeld.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.