Boodskap vir Vandag

Search
Close this search box.
Search

Maklike beloftes

Lees Psalm 66:13-20.

Skaars het ek na Hom geroep, of daar was reeds ’n loflied op my lippe (v 17).

Here, U weet mos hoe gou ons is met ons beloftes –
en hoe traag met die uitvoering daarvan.
Dit is immers maklik om énigiets te belowe,
veral as jy in die nood is,
maar wanneer die ergste moeilikheid
eers verby is, dan … dink jy ’n tweede keer
en verwens jou haastige mond.

U raak sekerlik moeg vir ons gesmeek en ons skreiende versuim
om dankie te sê. Wie kan U kwalik neem as U nie na ons wil
luister nie, anderpad kyk, u ore toedruk wanneer ons
desperaat u aandag wil trek?

Help U hulle wat alle krediet vir ’n goeie uitkoms self opeis?
Help U hulle wat herhaaldelik en met soveel stelligheid sê:
“Ek het myself gehelp!”?

En ai, Here, die “hulle” hierbo,
die “jy”, die “ons” – dit is ons almal … ook ek.
Veral ek.

U weet mos ek praat van myself.
U weet ek skaam my oor die talle kere dat ek
in my benoudheid geroep het: Here, Here, help!
En dan gou byvoeg wat ek alles in ruil sal doen.

Dan help U – soos ek gevra het.
En ek? Ek sal later daaraan aandag gee.
Wanneer ek tyd het. Wanneer ek die krag daarvoor het.
En U weet ek het nooit tyd nie, en my kragte is gedurig
nodig vir nuwe “ek”-projekte.

Dit alles gaan nou anders wees.
Ek gaan van nou af dankie sê waar almal dit kan hoor en sien.
Ek gaan my skatpligtigheid teenoor U in die openbaar erken,
en voor almal – hoorbaar, sigbaar, tasbaar – my dankoffer bring.

Maak dit ’n nuwe gewoonte, Here!
Maak dankie tog ’n lewenswyse.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.