Boodskap vir Vandag

Search
Close this search box.
Search

Wanneer U ingryp

Lees Psalm 68:1-7.

As God verskyn, spat sy vyande uitmekaar, en dié wat Hom haat, vlug vir Hom (v 2).

Here, wanneer U ingryp
is daar geen wegkruipplek vir goddeloses nie.
Hulle leer vinnig – en daarom gee hulle haastig pad.
Hulle was baie dapper toe hulle gedink het niemand sien
hul vergrype nie. Hulle hou mos nie rekening met U nie.
Hulle begryp nie hoe U werk nie. Hulle weet niks van U af nie –
tot hul skande en hul ewige skade.

Hul knoeiery het toe nie ongesiens verbygegaan nie.
Hul noukeurige plannetjies – daardie sluwe skematjies –
was toe nie so waterdig soos hulle gedink het nie.
Toe U op hulle skree, het alles blitsig gesink.
Sonder rimpeling verdwyn.

En hulle?
Die magtiges? Die manne van naam?
Skoonveld.

Al wat nou gehoor kan word, is die gesing van u kinders.
Kyk hoe dans hulle in die strate, Here!
Hoor die gelag, die gejubel, hoor hoe korswel hulle met mekaar.
Kort-kort sal een uitroep: “Halleluja!” – en dan val almal daarby in.
Hulle sing die ou bekende liedere; hulle maak sommer nuwes ook op.
Almal het die een refrein: God is groot! God is goed!

U is groot, Here, en U is goed vir ons.
Hoor hoe prys ons u Naam!
U is alles vir ons; buiten U
is daar niks wat ons begeer nie.
U sien om na ons in ons geringheid,
U koester ons in ons broosheid,
U sorg vir ons in ons behoeftigheid,
U bring ons na ’n nuwe woonplek.

En hulle?
Die magtiges? Die manne van naam?
Troosteloos.
En sonder tuiste.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.