Lees Psalm 72:1-4.

Leer tog die koning, o God, om te regeer volgens u wil, leer die koning om die reg te handhaaf soos U dit wil (v 1).

Ag, Here, soms is dit swaarder as ander kere – dié opdrag
om vir ons regeerders te bid. U vra darem groot dinge!
U stel hoë verwagtings aan u kinders …

Én aan hul koning.
Daarom, lyk dit my, sal ons vir hom
en sy mederegeerders móét bid –
sodat ons aan u wil gehoorsaam is
en hulle nie in u hande val nie.

Dus bid ek nou vir ons land se regeerders,
Here. Ek bid dat u geregtigheid sal seëvier
en dat u opdragte gehoorsaam sal word.
Dat U aan hulle goed duidelik sal maak
wat u voorkeure is en wie geregtig is op
spesiale sorg. Dat U hulle daarom sal weerhou
van eiebelang, selfverryking en partydigheid.

Ek bid dat u deernis vir armes en magteloses
in die regeerders se optrede weerspieël sal word –
in hul wette én in die uitvoering daarvan. Dat hulle
sal bly belê in dié land se belangrikste bate – sy mense.

Daarom bid ek ook dat hulle spesiale aandag
sal gee aan al ons land se kwesbare kinders –
dié wat hulle nie self kan verweer nie en wat
weinig status in die oë van ’n onsimpatieke
samelewing het. Dat die regeerders deur alles
wat hulle tot stand bring – al die noodsaaklike
vangnette – ons kinders behoorlik sal beskerm.

Here, ek besef alte goed dat die uitvoering
van die mooiste voornemens en die beste
wette uiteindelik by die bevoorregtes berus –
dit wil sê, by ons, u kinders. Ons wat in U
álles het wat ons hart begeer. Laat my dan
hierdie bevoorregte hart en mond oopmaak
vir hulle wat deur die lewe uitgesluit word.
Amen.

Barend Vos