Boodskap vir Vandag

Search
Close this search box.
Search

Keer hulle, Here!

Lees Psalm 83.

Moet tog nie afsydig staan nie, o God, moet tog nie stilbly en niks doen nie! (v 2).

Ag, Here, vergewe my dié ontevredenheid:
Dit is omdat U nie harder praat
en u gesig nie duideliker wys nie
dat ek dikwels in die verleentheid is.

Ek sê vir die mense: “Kyk wat gaan God doen!”
Dan sê hulle: “Ons sien niks.”
Ek roep uit: “Hoor ’n bietjie God se stem!”
Dan sê hulle: “Ons hoor nie ’n woord nie.”

Dan moet U húlle sien en hoor!
Hulle skop so ’n smalende lawaai op dat hoor
en sien vergaan. Ek is seker u ore tuit as hulle
so laster – dié met die groot mond en die nóg groter ego.

Hierdie openlike minagting is een ding;
hul sluwe sameswering ’n ander:
Hulle bring hul dae deur met planne maak.
Hulle wil u gesag ondermyn en u mense vernietig.
Hul agenda is eenvoudig: Daar is nie plek vir God-en-sy-gebod
én vir die verering wat hulle vir hulle opeis nie.

Daarom het hulle die sagste teiken gekies – u kinders,
juis dié vol weerloosheid en selftwyfel.
Hulle wag bloot vir die geskikte oomblik om toe te slaan.

Nou vra ek U, ek soebat: Keer hulle, Here!
Krap hulle noukeurige planne deurmekaar;
omskep hul magswellus in ’n warboel.
En, veral, snoer tog hul mond …
Dat die smalende kwaadpraat oor God en sy mense
kan end kry. Dat hul woorde sal opraak; dat hulle
uiteindelik sal skaam kry oor die onreg wat hulle bedink
en die boosheid waarmee hulle nog altyd weggekom het.

Maar nou sal U mos hard praat, Here!
Nóú sal hulle U duidelik sien.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.