Boodskap vir Vandag

Search
Close this search box.
Search

Weerloos

Lees Psalm 109:1-5.

U is die God wat ek altyd loof, moet tog nie my gebede onverhoord laat nie! (v 1).

Hoe weerloos is ek wanneer ek bid, Here!
Kwesbaar soos ’n kwikkie wat opkyk-opkyk
water drink. Uitgelewer aan hoop en vrees.

Daar is mos diegene wat op die loer bly
vir ’n geskikte geleentheid om aan te val.
Hulle maak woorde bymekaar soos klippe
en wag op daardie onbewaakte oomblik.
Hulle versamel slim argumente soos spiese
en slyp dit skerp genoeg vir die doodsteek.

Die naakte naïwiteit van ’n bidder
is waarskynlik die aangewese tyd
om hom te bespring en by te kom.
Dán is hy so blootgestel soos nooit.

Daarom, Here, verlaat ek my by voorbaat op U:
Ek glo dat U hulle wat my wil leed aandoen, sal wegkeer.
Ek glo dat U dié verregaande vermetelheid veragtelik vind.
Ek glo dat U hulle sal stilmaak of ten minste u ore toedruk.
Ek glo dat U hulle harteloosheid sien, hul slinksheid haat.

Kyk dan na mý hart, Here; ondersoek my motiewe.
Vind in my binneste die opregtheid wat U vereis.
Sien tog die desperaatheid om gehoor te word,
en dat my pleitrede u ore onverswak bereik.
Daarom sal ek enige liggaamsposisie inneem
wat U verlang – staan, kniel, vorentoe leun …
Ek sal voor U gaan lê as dit u wens is.
Kyk, hier vou ek my hande voor my gesig.
My ken rus op my vingers, my oë is bot toe.

Van altyd, tot nou toe, waag ek dit
om ’n kindjie klein voor U te wees.
Weerloos, broos, oop en bloot;
prewelend, wagtend
op U.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.