Boodskap vir Vandag

Search
Close this search box.
Search

Oorweldig

Lees Psalm 118:10-14.

My vyande wou my platloop en my ondergang bewerk, maar die Here het my gehelp (v 13).

Wanneer alles dreig om my te oorweldig, Here,
roep ek na U: “Te veel, Here!
Dit het te veel geword vir my!”
Dan gryp U in. U slaan hard.
U breek mensekrag
en vernietig ’n oormag.

Ek verkies om aan u kant te wees.
(Het ek ’n ander keuse?)
U dink nou wel nie soos ek nie
en u weë is nie myne nie.
Boonop laat u tydberekening
in my oë veel te wense oor.

Maar U moet dit asseblief met my uithou –
ek leer stadig maar seker hoe U dink,
wanneer U oordeel, en wat vir U saak maak.
En hoeveel u ingrype regtig vir my beteken.

Ek pleit dus by U: Wees geduldig met my, Here.
U groot dade is te oorweldigend vir my beknopte begrip.
U ferm hand in hierdie situasie het alle teenstand gesmoor.
Ook dié in my skeptiese hart.

Al wat nou vir my oorbly, is om daarop terug te kyk,
daaroor na te dink, en my te verwonder aan U.

Ek voel nog die houe wat hulle op my laat neerreën het …
Ek wonder hoe voel húlle vandag.

Ek ruk steeds snags wakker wanneer my lyf
die stampe en stote so helder onthou.
Ten minste slaap ek deesdae weer.

U het vuur onder hierdie nagmerrie gemaak,
Here; my las het in rook opgegaan.
En alles het nou tot rus gekom, soos as
wanneer wind gaan lê.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.