Boodskap vir Vandag

Search
Close this search box.
Search

Maak my slim!

Lees Psalm 119:97-104.

Van u bepalings het ek nie afgewyk nie, want U het my dit geleer (v 102).

Om u wet lief te hê, Here, sal my slimmer
as almal maak. As hulle my dan as “wetgeleerd!”
uitkryt, is dit niks minder nie as ’n kinderagtige
uitweg. Slegs dié wat sonder ontsag vir U
en u voorskrifte leef, sal so iets wil sê.

Want om wetteloos te leef
is tog sonder meer daaraan gelyk
om liefdeloos deur die wêreld te gaan.
Dáár lê immers die sagte hart van u wet:
die omvattende liefde vir U en vir ’n medemens.

Ag, Here, en U ken my ewigdurende stryd om afskeid
te neem van harde selfliefde wat nooit ruimte
vir ’n ander het nie; en beslis nie vir U nie.
U is immers besig om my te oortuig van die deugde
van opreg liefhê. Om my hart stukkie vir stukkie
in te palm. Totdat U uiteindelik alles in besit geneem het
en ek dan in goeie hande is. U wyse hande, wat my gaandeweg
touwys maak en leer wat ek nodig het om te verstaan.

Sodat ek in dié wêreld kan leef en laat leef.
Wýs leef.
Straatslim.

Om koers te hou en uit te hou.
En veral om vas te hou aan hulle
wat my greep nodig het: Dié wat
minder het as ek en straks nóg
minder van liefhê weet as ek.

Saam sal ons dan op U wag,
ek en die geliefdes.
Ons sal wag op u woord
wat ons op die regte tyd sal bereik.
Van heuning sal dit drup en suikersoet
sal dit tuiskom in ons hart.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.