Boodskap vir Vandag

Search
Close this search box.
Search

Ek slaan my oë op

Lees Psalm 121.

Hy sal nie toelaat dat jy struikel nie; Hy wat jou beskerm, slaap nooit nie (v 3).

Here, hier by ons rond is daar min berge;
meer vlaktes. Sommige sê selfs woestyn.
Dit neem nie weg dat ons hier
daagliks na U opkyk nie – welwetend waar
ons hulp vandaan kom. U het tog ook dié
dorre streek gemaak. Ook vir ons neem U
onder u vlerke. Ons wat soms skoorvoetend
agter U aan trek; ons wat dit tog so nodig
het dat U nougeset op ons kom en gaan let.

Daarom is dit wonderlik om te weet dat U
u aandag nie ’n oomblik laat glip nie.
Laatnag, wanneer ons waaksaamheid
verslap het sodat ons ’n slaapdronk
prooi geword het, dan bly U op.
En kyk U met deernis na ons,
u slapende, vuilerige woestynkinders.

Wanneer ons dan ontwaak en kragtig en o so
oormoedig die dag aanpak, dan vorm U ’n skans
teen die onvermydelike gevolge van ons verwaandheid.
So volg U ons stilweg – van ligplas tot skadukol;
van vroegdag tot laat. Sit U ons agterna
as ons onderdeur die draad kruip en keer U
wanneer ons ons hand na verbode vrugte uitsteek.
Plaas U ’n wag voor ons mond.
Knoop U ons gewete vas.

Moet tog nooit u beskermende hand van ons
af terugtrek nie, Here! Ons lewe hang daaraan.
Wanneer ons vol ywer optrek om ons roeping
te vervul, moet U ons lei. En as ons voetseer
terugkeer, nie seker of ons aan u verwagtings
voldoen het nie – ontmoet ons tog in liefde.

En moet asseblief tog nooit wegkyk as ons
– moeg en desperaat en vol selfverwyt –
na U opsien nie.
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.