Lees Psalm 135:13-14.

Die Here behartig die regsaak van sy volk: Hy ontferm Hom oor sy dienaars (v 14).

Here, in u Naam het ons deur die jare heen
méér as gebid en gevra, gesoebat en gepleit.

U Naam was ons banier in vrolike feestye
en donker stryddae. Ons het dit trots laat
wapper en openlik daarmee te koop geloop.
Dit soos ’n vlag gehys; daarmee kleur beken
en só vir almal duidelik laat weet en verstaan:
“As God vir ons is, wié kan teen ons wees!”
Ja, Here, ons het u Naam nog altyd hoog gedra.

Ook in ons klein bestaan is dit vir ons ’n skild;
ons speld dit as lapelwapen vas, om ons teen ons
eie kleingeloof te beskerm. Skryf dit herhaaldelik
op deure en glase – adverteer só ons oortuigings.
Ons sê dit oor en oor as mantra teen versoekings
en duiwelse vrese. Gebruik dit om krag aan ons
twyfelagtige beloftes te gee; aansien aan argumente.

Ons vertel graag dat ons in u Naam
gekom het tot waar ons nou is.
Dat dié Naam ons doen en late
en strewes stempel. En dat dit ons steeds,
dag ná dag, dra na waar U ons wil hê.

Ai, Here, ek is deesdae nie meer so seker
dat ons – ék – nie maar u Naam deur die jare
ydellik gebruik het ten einde sélf naam te maak nie.

Daarom wil ek mooi vra
of U my, en almal wat met my
moet saamleef, tog nie van my
skynvroomheid sal verlos nie.
Ontferm U asseblief oor my,
ten spyte van dié misbruik.

Ek vra dit
om u Naam ontwil.
Amen.

Barend Vos