Boodskap vir Vandag

Search
Close this search box.
Search

Liefde, onbeperk …

Lees Psalm 136:1-9.

Loof die Here, want Hy is goed. Aan sy liefde is daar geen einde nie (v 1).

Here, sonder einde is ons lof aan U!
U het ons uit die staanspoor onder u vlerke geneem:
U het vir U ’n aarde gemaak –
en ons daarop laat woon.
U het ’n hemel as u tuiste geskep –
en ons daarvoor bestem.
U het ligte gemaak om oor duisternis te heers –
en óns word deur hulle bedien.

Só gee U van die begin af ’n stuk ewigheid weg
aan tydelike skepsels soos ons: ondankbare
ontvangers van Goddelike gunste en gawes.

U hou egter nooit op om ons só te begenadig nie.
Lewenslank dra ons u vernuftige lig in ons liggaam;
baai ons in die liefdeskynsel wat van U af kom.

Maar, Here, dit is die waters wat u spesiale geskenk
aan my is. ’n See vol woelende goedheid. Altyd anders.
’n Uitgestrekte teenstrydigheid: rustelose bron van vrede;
gryper van lewe; ’n gesoute gewer van troos.

Daarom kan U begryp dat ons voortdurend
op soek is na geskikte maniere om U te dank.
Ons probeer so al wat ons kan om die omvattende
lof wat U toekom, na behore uit te druk –
oorspronklike segswyses, kreatiewe wysies.

Intussen bly my dank aan U ’n daaglikse refrein.
Want bo alles is my lewe ’n voorspelbare stuk voorspoed;
al die trane en somtyds aaklige ontnugtering ten spyt.

Maar hoekom sal ek kla?
Want my voete trap getroos op u vaste aarde
en ek strek my arms vol hoop na u hemel uit.
Rondom my gloei die vredevolle lig.
En iewers,
iéwers wag die see …
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.