Boodskap vir Vandag

Search
Close this search box.
Search

U verander alles

Lees weer Psalm 30.

Ek was in rou, maar U het my van vreugde laat dans. U het my rouklere uitgetrek en vir my feesklere aangetrek (v 12).

Die dag as my lewensgeskiedenis opgeteken word,
Here, sal U en u dade die vernaamste plek daarin inneem.
Soveel wonderwerke wat U darem gedoen het …
En ek was keer op keer aan die ontvangkant daarvan.
Ek kan bladsye vol net daaroor skryf. Hele hoofstukke
daarmee vul. Prentjies daarby teken. Voorbeelde noem.

Wat my altyd sal bybly, is die manier waarop U dinge omgekeer het.
Die opperste verleenthede wat U in gulde geleenthede verander het.
Die reguit houe met die krom, krom stok.
Die wiel wat toe wél gedraai het –
met U aan die stuur van sake.

Dan is daar steeds mense wat wonder of U omgee.
Of U hoegenaamd bestaan. Hulle wil alles aan “toeval” toeskryf;
die “noodlot” krediet gee. Hulle sê “per ongeluk”.
Of: “Soos die duiwel dit wou hê …”
(Verbeel jou: hý!)

Pleks dat hulle dié eenvoudige formule onthou:
“Deur die genade van die Here …”
Want dit ís so dat u genadige oor elke keer gehoor het
toe ek geroep het. U genadige oog het gesien toe ek oorval is.
U genadige hart het gebreek toe ek stukkend was.
En dan het U opgetree, vir my ingetree –
en álles genadiglik anders gemaak.
Dit is mos die storie van my lewe, Here!

Maar noudat ek aan alles terugdink, nou besef ek:
Ek moes minder gewonder het
en minder simpel en dikwels selfsugtige vrae gevra het.
Ek moes meer vir U gesing het.

Is dit te laat?
Is lof aan U ooit betyds?
Goed, dan. Hóór my lied, Here:
Halleluja! Halleluja!
Halleluja, Here!
Amen.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.