Boodskap vir Vandag

Search
Close this search box.
Search

Godsdienstiges se moeilikheid

Lees Handelinge 5:27-32.

“Het ons julle nie uitdruklik belet om die mense in hierdie Naam te leer nie? En nou lê die hele Jerusalem vol van julle leer!” (v 28).

Die Joodse godsdiensleiers, verlig dat die moeilikheidmaker finaal stilgemaak is, het dit toe verkeerd gehad: Jesus se volgelinge sou sy laaste opdragte na die letter uitvoer. Hulle sou oor Hom praat, waar hulle ook al kom.

Ironies genoeg het hulle hulle dikwels tussen daardie einste godsdienskampioene bevind. Hulle het meestal in die sinagoge en tempel oor Jesus gepraat, tot die leiers se ergernis. Daar is hulle verwyder, dikwels hardhandig. Soms is hulle selfs tronk toe gesleep.

In dié verhaal ontmoet ons Petrus en die ander apostels wat op ’n raaiselagtige manier uit die tronk ontsnap het. Nou is hulle terug in die tempel, besig om te preek en om gretige toehoorders te katkiseer. Uiteraard was die owerstes woedend. Hulle bring die apostels voor die Joodse Raad en niemand minder nie as die hoëpriester skel op hulle: “Het ons julle nie uitdruklik belet …!”

En die groepie skuldiges? Hulle hervat hul lesing waar hulle laas onderbreek is. Hulle gaan doodgewoon voort, nou met ’n openlike beskuldiging daarby, oor hoe die leiers die Verlosser vermoor het. Die Een wat hulle tot bekering kon bring, wat hul sondes kon vergewe.

Hoe sou die godsdiensleiers op dié bevrydingsboodskap reageer? Geen prys vir ’n korrekte antwoord nie, helaas. Ons bly bloot met die ongemaklike gevoel dat dinge intussen nie juis verbeter het nie. Dat godsdienstiges, mense soos ons, nie graag ons gemaksone wil prysgee nie. Ons kies om te glo wat ons wil glo. Anders kom ons veelgeroemde geestelike volwassenheid in die gedrang. En ons ingeligtheid onder verdenking.

Here, u waarheid tref my altyd sleg. Ek is so jammer dat U my só moet sien.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.