Boodskap vir Vandag

Search
Close this search box.
Search

Net nie teen Hóm nie …

Lees Handelinge 9:1-6.

Hy het op die grond neergeval en ’n stem vir hom hoor sê: “Saul, Saul, waarom vervolg jy My?” (v 4).

Later, in sy briewe, kry Bybellesers ’n idee waarom Saulus so ’n intensiewe haatveldtog teen die Jesusvolgelinge gevoer het. Wat dit was wat hom so ’n mislike mens gemaak het, so ’n gehate, gevreesde figuur. Gaan lees maar, byvoorbeeld, in Galasiërs 1 en Filippense 3. Dit is ook daar waar ons van die keerpunt verneem wat in sy lewe gekom het, die drama waarvan ons die eerste keer in die boek Handelinge lees. Van die doelgerigte reis Damaskus toe, die skielike lig, die stem. Sy, Paulus, se vreemde vraag: “Wie is U, Here?” (v 5).

En die nóg vreemder antwoord wat hy ontvang: “Ek is Jesus.”

Die vraag bevat “Here”; die antwoord “Jesus”. Daar is dus geen twyfel waar die stem vandaan kom nie. Fassinerend, egter, is die stem-uit-die-hemel se verdere verduideliking: “Dit is vir My wat jy vervolg.”

Saulus, onderstebo geslaan, gesig in die sand, moet boonop verneem dat sy ywer nie teen ’n klompie afvalliges is nie, nie teen ’n groep weerlose mense nie, maar teen ’n persoon. ’n Persoon.

En nou weet hy dat hy verloor het. Dat hy nooit ’n kans gehad het nie. Hierdie dag, hierdie vernedering, sal hy nooit vergeet nie.

Ons ook nie. Ons, sy broers en susters wat deur die eeue sy storie lees, sal altyd onthou dat jy nie met Jesus kragte meet nie. Dat wie kans sien om sý volgelinge aan te durf, met Hom te doen sal kry. Dit is immers Hy wat saam met hulle ly. En dit is Hy wat namens hulle rekenskap sal eis.

Saulus kry klaarblyklik ’n tweede kans. Het hy regtig gehoor?

Keer my, Here, dat ek nie met u kinders baklei nie. Ek sal dit nooit oorleef nie.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.