Boodskap vir Vandag

Search
Close this search box.
Search

Buitepossers

Lees Handelinge 11:19-26.

In Antiochië is die gelowiges die eerste keer Christene genoem (v 26).

Hulle het hul Leier se Naam geken en liefgehad. Christus heet Hy, oftewel Messias. Gesalfde van God. Nou het hulle, hier in Antiochië van alle plekke, ook húl naam gekry – Christene, heet hulle nou. Volgelinge van die Gesalfde.

Hopelik was die kwessie oor wie almal vir dié benaming kwalifiseer, ook nou uitgestryk. Die Jesusvolgelinge wat ver gevlug het om aan vervolging te ontkom, was hoeka uit verskillende windrigtings afkomstig, selfs van Siprus en Sirene (v 20). Hulle sou geweet het hoe God se keuses lyk wanneer Hy vir Hom kinders bymekaarmaak. En dit is toe ook hulle wat die Jesusverhaal aan die Griekssprekendes in Antiochië verkondig het. Afstand bring perspektief, dit weet almal. By Godskinders is dit nie anders nie.

Daarom is dit nie vreemd dat al hierdie dinge in Antiochië afspeel nie. Die eerste Christensendelinge, Paulus en Barnabas, sou later ook vanaf hierdie kosmopolitiese gemeente uitgestuur word, en weer hierheen terugkeer om verslag te doen.

Antiochië, ja. Nie Jerusalem nie. Nie daar waar Petrus-hulle gewerk het nie. Nie by die plek waar die groot dinge – die kruisiging en opstanding en die uitstorting van die Heilige Gees – plaasgevind het nie. Feit is: Die plek waar die Christene regtig “kerk” geword het, die beweging van God in hierdie wêreld, was aanvanklik niks meer nie as ’n vlugtelingkamp. ’n Tussenstasie.

Dit behoort niemand te verras nie. Christus se kerk het nie ’n hoofkwartier nie. Hierdie kerk werk vanaf ’n buitepos. Dié waarheid herinner kerkmense dan sommer ook daaraan dat hulle altyd pelgrims op ’n deurreis sal wees. Tentopslaners. Bywoners, met ’n gans ander vaste adres.

By U is ek tuis, Here Jesus. Ek dra dan u Naam.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.