Boodskap vir Vandag

Search
Close this search box.
Search

’n Groot droogte

Lees Jeremia 14:1-6.

Wildedonkies staan op die kaal heuwels en snuif die wind net soos jakkalse; hulle oë raak dof, want daar is nie meer gras nie (v 6).

Hartverskeurend. Dit is hoe die prentjies lyk wat hier vir ons geteken word.

Ongelukkig is dié prentjies in die destydse leefwêreld van God se volk vir ons hier in die verre Suiderlande alte bekend. Die poëtiese skoonheid van hierdie sestal verse kan nie opweeg teen die ellendige waarheid waaroor dit destyds berig het en wat soveel van ons droogtejaar ná droogtejaar aan eie lyf voel nie. Wat ons seisoen ná seisoen met ons eie oë aanskou.

Maar mooi is nou eenmaal mooi – en hierdie woordprentjies in Jeremia 14 is beeldskoon in sy dorre strakheid. Hoor dan: “Hulle bring hulle kruike leeg terug. Hulle is verslae en verleë, hulle koppe hang” (v 3). “Die takbok lam in die veld en gooi haar lam weg omdat daar nie gras is nie” (v 5).

Duisende jare gelede, en tot vandag toe …

Waar kom sulke uitmergelende droogtes vandaan? Het klimaatsverandering dan destyds reeds sy tande gewys? Of, soos sommige dit wil hê, was God tóé al so kwaad vir sy mense dat Hy die reën van hulle weerhou het? Kortom, wie moet ons glo: die weerprofete, die doemprofete, die profete wat beweer dat hulle in God se Naam en op sy gesag profeteer?

Miskien moet droogtes en ander natuurrampe ons eerder stilmaak. Stil genoeg sodat ons ons medemens en hul diere se hulpgeroep kan hoor. Sodat ons gou kan help, sonder allerlei predikasies en ander slimstories wat ons ore besoedel en ons deernis kaap.

En wanneer ons stil genoeg is, sal ons dalk ook God se stem hoor. Sy antwoord op dié desperate vraag: Wat wil U vir ons in swaarkrytye sê, Here?

En wat wil U hê moet ek doen, Here?

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.