Boodskap vir Vandag

Search
Close this search box.
Search

My Jerusalem

Lees Psalm 122:1-5.

Ek was bly toe hulle vir my gesê het: “Kom ons gaan na die huis van die Here toe” (v 1).

Ons het hierdie psalm reeds vroeër vanjaar gelees, en ons weet dat dié psalmdigter nie die kerk of selfs die sinagoge of die tempel bedoel wanneer hy sy psalm op so ’n bruisende noot begin nie. “Huis van die Here” is vir hom Jerusalem, die stad van sy hart. Dit is sy geestelike tuiste en die hoogste baken van sy en sy volksgenote se godsdiensbelewing.

Wat ’n voorreg om so ’n tuiskomplek te kan hê! Dit is sy oase in die lewe se woestyn, die drinkplek van die trop waarvan hy deel is. Hierdie plek maak hom bly. Die tydjie wat hy daar deurbring, voed en versterk sy geloof.

Gelowiges uit die Katolieke tradisie ken dit ook: daardie een stad wat hulle aan God se teenwoordigheid herinner. Die setel waarheen hulle altyd, al is dit net in hul gedagtes, terugkeer. Vir hulle is Rome “die huis van die Here” wat hulle bly maak. Hul Jerusalem.

Elke gelowige het so ’n plek nodig. ’n Oase waarheen hulle telkens terugkeer. Ja, “Jerusalem” word dalk vir elkeen anders gespel, maar die blydskap, die tuiswees, die uitsien na die tuiskoms daar, is universeel. Soos die uitmergelende woestyn ’n onontkombare lewensfeit is.

Nee, daar hoef nie ’n nasionalistiese etiket aan jou Jerusalem te kleef nie (alle Katolieke gelowiges praat immers nie Italiaans nie), maar die plek met die bekende en geliefde geloofsimbole daarbinne behoort nooit iets anders aan jou te doen as om jou bly te maak nie. Om jou te laat voel: Hier is ek tuis. Dit is my Jerusalem.

Dit is hier waar jy boonop leer: My Jerusalem is veel meer as ’n plek; dit is ’n Persoon.

U is my tuiste, Here. U laat my veilig woon. U maak my bly.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.