Boodskap vir Vandag

Search
Close this search box.
Search

Gebed van die desperates

Lees Psalm 72:1-7.

Leer tog die koning, o God, om te regeer volgens u wil, leer die koning om die reg te handhaaf soos U dit wil (v 1).

Wat maak onderdane wanneer hulle iets van hul koning wil hê, maar hulle het geen toegang tot die troon nie? Wat maak diegene wat aan gesag en selfs mag uitgelewer is waaroor hulle geen beheer het nie?

Eenvoudig: Hulle bid. Hulle vra die Koning van die konings om hulle te help. Hulle het immers toegang tot Hom. Hulle weet dat sy gesag en sy mag onderhewig is aan sy liefde. Hulle ken Hosea 11.

Psalm 72 is veel meer as ’n loflied aan ’n koning; dit is ’n smeekroep na ’n Koning. Ons het reeds aan die begin van hierdie jaar vasgestel dat dié psalm ’n desperate gebed bevat van mense wat die beskerming van die Koning nodig het in ’n wêreld wat met ’n ystervuis geregeer word.

En wat daarvan as dié gebed deur ’n koning self gebid word? As ons die “Van Salomo” aan die begin en die “Hier eindig die gebede van Dawid, seun van Isai” aan die einde in ag neem?

Is dit nie dan selfs veelseggender nie? Dié dat ’n baas weet om laag voor die Baas te buig? As hy weet waar sy hulp vandaan kom wanneer hy die armes en die verdruktes hoor roep? As hy ’n kragtiger hand as sy eie soek wanneer die triomfantelike gebulder van die verdrukkers in sy ore weerklink?

“Ek weet hoe afhanklik ek van God is” was nog altyd die eerste nota in ’n koninkrykskind se paspoort. As daardie bevoorregte mens boonop deur die Koning in die een of ander gesagsposisie aangestel is en vertrou word, is hierdie inskrywing boonop die kosbaarste ooit.

Ek ken my beperkings, o Koning. Daarom bly my oë op U gerig.

Barend Vos

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.