Lees Spreuke 14:15.
’n Verstandige mens oorweeg elke tree wat hy gee (v 15).
Versigtigheid is die wagwoord van wyse mense. Dwase mense is voortvarend. Hulle praat maklik en doen oorhaastig sekere dinge, maar hulle deurdink nie die gevolge van hulle dade voor die tyd nie. Daarom dat hulle dwase dinge aanvang.
As jy ’n student in die Here se skool van wysheid is, is elke tree wat jy gee ’n deurdagte een. Jy weet immers dat jy op die Here se pad stap. Op jou skouers rus die dure plig om wys en opreg te wees. Jy moet ’n voltydse advertensie wees van die Here se nuutmakende krag en goedheid. Jy moet sy liefde en genade weerkaats in alles wat jy sê, dink en doen. Daarom dink jy mooi voordat jy iets doen. Daarom oorweeg jy al jou opsies versigtig voordat jy optree, want dit is wat wysheid van jou vra. Dit is wat die Here van jou verwag.
Luister versigtig na wat ander sê. Moenie te gou reageer met ’n ondeurdagte opinie nie. Dink eers rustig na oor alles wat gesê is. Kies jou woorde met oorleg. Loop versigtig, anders trap jy in die strikke van die dwase. Moenie dwaas wees nie, want jy is die Here se spesiale eiendom. Daarom leef jy wys.
Here, dankie dat U my leer om versigtig te leef!
Stephan Joubert
