Lees Markus 3:1-6.

“Mag ’n mens op die Sabbatdag goed doen of kwaad doen …?” (v  4).

Die sabbat was die heiligste dag vir die Jode. Van Vrydagaand met sononder tot Saterdagaand met sononder kon mense amper nie asemhaal nie, so streng moes hulle al die reëls van hulle godsdienstige leiers rondom die viering van die sabbat onderhou.

Jesus het Hom egter nie veel hieraan gesteur nie. Hy was sommer al vroeg-vroeg in die moeilikheid toe Hy sy dissipels laat koringare pluk het op ’n Sabbatdag. Om alles te kroon het Hy boonop ’n man se gebreklike hand op hierdie heilige dag genees. Toe was die gort gaar. Vir mense wie se godsdiens net uit reëls bestaan, is daar immers nie veel genade met sabbatoortreders en met siekes nie. Daarom was hierdie “godsdienstiges” briesend kwaad vir Jesus.

Jesus het egter verby al hierdie mensgemaakte reëls gekyk. Wat vir Hom belangrik was, was om stukkende mense se lewe heel te maak, al was dit ook op ’n Sabbatdag. Die godsdienstiges se woede het Hom nie gekeer om elke dag goed te doen aan ander nie. Hy is immers ook Here oor die sabbat (Mark 2:28). Volg in sy voetspore en gebruik elke kans wat jy kry om mense in nood te help.

Jesus, laat my lig elke dag skyn vir ander mense.

Stephan Joubert