Lees Psalm 60.
Laat dit tog weer met ons goed gaan (v 3).
Wanneer Dawid hier in Psalm 60 ’n lied skryf oor sy geveg teen die Arameërs, is daar nie veel vreugde in sy woorde nie. Eintlik is daar kommer by hom dat God sy volk verstoot het. Daarom het hulle nou die Here se spesiale reddingsmag dringend nodig.
Terloops, dalk is jy ook bekommerd oor jou eie verhouding met die Here. Hoeveel foute het jy al in jou lewe gemaak? Hoeveel kruisies was daar al langs jou naam? Begaan jy ook misstappe by die werk? Of dalk in jou huwelik? Wat van op jou pad met God? As jy eerlik is, sal jy moet erken dat jy op alle vlakke van die lewe toetse druip; sommer gereeld ook. Moet tog nie dink jy is te vars om te flop nie. Dit was die groot fout wat die Israeliete gereeld gemaak het. Dawid wil juis hierdie fout systap deur ernstig voor die Here te kom staan met ’n hart vol opregtheid. Sonder God se spesiale hulp is hy en sy mense gedoem tot mislukking. Geen geveg se uitslag is dan gewaarborg nie. Geen oorwinning is vanaf hierdie laagtepunt ooit seker nie.
Vergeet daarvan om God te probeer beïndruk. Jy het in elk geval niks wat Hy nodig het nie. Jy is te arm om iets vir Hom aan te bied. Die goeie nuus is dat God onvoorwaardelik wil hê dat jy veilig aan sy voete sal rus. Daarom moet jy Hom toelaat om op sy eie terme na jou toe te kom. Geloof is om Hom op sy woord te neem en in Jesus se Naam aan sy voete tot rus te kom omdat Hy jou aanvaar soos jy is.
Here, hou my rustig daar aan u voete.
Stephan Joubert