Lees 1 Tessalonisense 1:9-10.

… en dat julle sy Seun wat Hy uit die dood opgewek het uit die hemel verwag (v  10).

’n Geloofsbelydenis is ’n kernagtige samevatting van wat ’n mens glo. Dit sê in ’n neutedop wat jy bely oor jou geloof. Die heel vroegste weergawe van ’n geloofsbelydenis in die Nuwe Testament vind ons hier in vers 9-10. Hier is die basiese boustene van wat die vroegste Christene op die sendingveld gehoor het en wat hulle oor God geglo het. Kyk net:

1. Geloof is ’n bekering weg van die afgode af na die lewende God toe.

2. Geloof se inhoud is die wete dat God vir Jesus uit die dood opgewek het.

3. Geloof is om vas en seker te weet Jesus kom weer.

4. Geloof is om te weet Jesus red ons van die oordeel van God wat by die wederkoms op alle mense wag.

Hier het jy die hart van die Christelike geloof in ’n neutedop. Hierdie geloofsbelydenis se inhoud het die apostel oor en oor aan sy gemeente geleer in die drie weke wat hy daar in Tessalonika gewerk het. Tweeduisend jaar later is dit steeds waar. Vandag nog kan ons niks wegvat van hierdie eenvoudige belydenis wat Paulus in Tessalonika oor ons geloof se basiese inhoud maak nie. Dit is steeds die enigste evangelie. Dit is jou enigste hoop in hierdie lewe en in die lewe wat kom.

Ek bely my geloof in U as drie-enige God.

Stephan Joubert