Lees Amos 6:5.

Julle maak liedjies vir die harp, julle dink hulle vir musiekinstrumente uit (v 5).

Ons staan weer stil by die regte manier van sing tot die Here. Christelike musiek moet iewers gekeur word. Gemeentes moet prosesse in plek hê waardeur daar gekyk word na die Skrifgetrouheid van die woorde en die singbaarheid van ons liedere. Sommige Christelike musiek is nie bedoel om deur kore gesing te word nie, maar deur individue.

’n Verskeidenheid instrumente kan gebruik word vir die uitvoering van kerkmusiek. Die vraag of die orrel vervang moet word met kitare en tromme is die verkeerde vraag. Dit is nie die soort musiekinstrument wat belangrik is nie, maar watter musiekinstrumente die beste geskik is om bepaalde liedere tot eer van God te begelei, en watter nie. Soms is die orrel by uitstek geskik, maar in ander gevalle nie.

Die pad vorentoe? Ons moet steeds na nuwe liedere soek om die kosbare geestelike liedere in ons kerklike liedboeke aan te vul. Die hoofsaak is egter dat dit alles tot eer van die Here moet geskied. Op die ou end gaan dit nie oor wat óns wil hê en wat nie, maar oor God. Ons moet sing om sy Naam te verheerlik. Anders moet ons stilbly. Die mooiste geestelike musiek help net mooi niks as ons nie met ons hart sing nie.

Here, voor U is ek stil totdat ek tot u eer sing.

Stephan Joubert