Lees Markus 4:21-25.

“As iemand ore het en kan hoor, moet hy luister!” (v 23).

Vandag se mense is wêreldburgers wat deur die internet, selfone en internasionale werkgeleenthede die aarde vol leef. Hulle is denkers wat nie alles vir soetkoek opeet nie.

Die goeie nuus is dat hierdie mense ’n groot behoefte het aan egte godsdiens wat ’n daadwerklike verskil aan hulle lewe sal maak. Watter wonderlike geleentheid vir die kerk om die wonderlike evangelie van Jesus Christus te verkondig!

Maar juis omdat hierdie geslag nie sommer alles wat vir hulle opgedis word klakkeloos aanvaar nie, durf godsdiens nie vandag op uitgediende maniere oor en oor gesirkuleer word nie. Die tyd van ’n starre, kant en klaar bedinkte godsdiens is verby.

’n Geloof wat egter op opwindende maniere vertel van Christus wat gekom het om mense vry te maak en nuwe lewe te gee, sal die nuwe geslag se verbeelding aangryp. Die verskil wat hierdie boodskap maak, moet egter sigbaar wees op voetsoolvlak. Dit moet gesien en gevoel word in ons elkeen se lewe. Ons moet bruis met egte, lewensveranderende energie vir God en vir ander.

Jesus, dankie dat U my lei om te doen wat U vra.

Stephan Joubert