Lees Handelinge 3:17-19.
“Daarom, bekeer julle en kom tot inkeer. Dan sal God julle sondes uitwis” (v 19).
Bekering is die hart van kerkwees. Dit is die enigste manier waarop jy wettig toegang tot die kerk van die Here kan kry. Al is jou naam op die kerkregister, al is jy elke Sondag in die kerk, al gee jy ’n maandelikse bydrae en al probeer jy reg leef, maak dit nog nie van jou ’n Christen nie. Die enigste pad na God is deur bekering. Dit beteken dat jy afdraai van jou pad van sonde en Christus toelaat om jou te red. As jy voor Hom staan, bely jy jou onvermoë om jouself te verlos. Jy verklaar jouself bankrot en werp al jou hoop op Hom om jou te red. Dan verbind jy jou ook van daardie oomblik af om net op sy pad te stap en slegs na die Heilige Gees se instruksies te luister.
Sonder bekering is daar geen lewe nie. Daarsonder is mense lewende dooies – suurstofdiewe! Deel jy in die nuwe tyd van verkwikking wat nou van die Here af kom? Nie? Wel, dan moet jy tot bekering kom. Die Here is hier en Hy roep jou nader.
Plaas jou lewe in sy hand en vertrou Hom om jou met sy reddende bloed nuut te maak.
Here, red my!
Stephan Joubert
