“Ek is die Here jou God wat jou uit Egipte, uit die plek van slawerny, bevry het” (Exodus 20:2).
Dié week se teks is vreemd genoeg die tien gebooie.
‘n Mens wil amper vra: Hoe rym hierdie skynbaar ou wettiese geskrif met die Lydenstyd, met die storie van se Jesus lyding en dood aan ‘n ruwe kruishout?
Die sleutel lê daarin dat albei tekste na ‘n barmhartige God verwys wat mense wil bevry.
Die tien gebooie word nie verniet ‘n vryheidsmanifes genoem nie. Israel het reeds eeue vóór Christus se koms, nadat hulle uit die slawerny in Egipte bevry was, hierdie geskrif omhoog gehou as ‘n getuienis dat Gód hulle bevry het. Hulle het daarvan getuig dat God hulle met die gee van sy gebooie nóg dieper in hierdie vryheid wil inlei, ja, in die nuwe lewe wat ná Egipte gewag het.
Tereg skryf Terence Fretheim: “The law and the service to God and the world it entails is not to be understood as another form of bondage. The law is a gift of a redeeming God.”
En wanneer Jesus ly, is dit dieselfde God se werk om ons fináál van alles te bevry – skuld, skaamte, minderwaardigheid en onverskilligheid, dinge wat ons kan verhinder om hierdie gawe van nuwe lewe met vertroue en oorgawe te ontvang en te geniet.
Dít is tog ‘n geweldige troos!
Dankie weer eens Here dat ek mag weet: U is nie ‘n God wat mense onderdruk of minag nie. U wil ons bevry! Help ons om uit hierdie vryheid te leef. Amen
Carel Anthonissen
