’n Sagte antwoord laat woede bedaar; ’n krenkende woord laat woede ontvlam. Kalmerende woorde bring lewe, skynheilige woorde breek mense. ’n Humeurige mens soek skoor; ’n verdraagsame mens maak rusies uit die wêreld – Spreuke 15:1, 4, 18.
Daar is krag in kalmerende woorde. ’n Sagte antwoord is ’n koel reënbuitjie wat vlammende humeure laat afkoel. Die woorde van vredemakers bring lewe. Daarom sê Christus: “Geseënd is die vredemakers.”
Ons is geroep om Christus se vrede uit te leef. Nét daar waar ons is. Wanneer ons moeg, geïrriteerd, honger, onseker, ontsteld, selfsugtig of sommer net doodeenvoudig moedswillig is, laat een onnadenkende woord of skewe kyk maklik die vrede aan skerwe spat.
Ons kan beswaarlik verwag dat daar vrede op aarde moet wees wanneer selfs ’n klein kuddetjie geliefdes sukkel om in vrede saam te leef. In ’n plattelandse gemeente het daar elke Sondag twee vooraanstaande families in die kerk gesit. Weerskante van die paadjie. Hulle het na dieselfde boodskap geluister, dieselfde God aanbid. Op straat het hulle mekaar egter vermy. ’n Dispuut van 50 jaar oor waterregte het hulle vyande gemaak. Hul trots het hulle daarvan weerhou om vrede te maak.
Toe kom daar ’n nuwe, jong predikant. Hy was ’n vredemaker. Sonder om doekies om te draai het hy hulle daarop gewys dat die eie ek dikwels die pad na ware vrede versper. Hy het hulle help insien dat vrede ’n opdrag is en dat Christus dit van ons as sy kinders verwag. Christus se woorde in Johannes 14:27 het vir hulle begin oopgaan: “Vrede laat Ek vir julle na; my vrede gee Ek vir julle.” En hulle het dit begin uitleef.
Here, maak my gehoorsaam aan u vredesopdrag. Amen.
