Moenie tuis raak in hierdie wêreld met al sy boosheid nie. Nee, laat God julle van binne af nuutmaak. Laat Hy julle manier van dink verander sodat julle kan weet wat Hy van julle verwag. Dan sal julle ook weet wat sy wil is en hoe julle julle hele lewe elke dag aan Hom moet oorgee – Romeine 12:2 (Die Boodskap).
’n Christen loop die gevaar om te stagneer. Jy lees later so dikwels die Bybel en hoor dieselfde boodskappe dat jy afstomp. Jy is nie meer toeganklik om nuut te hoor en te dink nie.
Elke keer wanneer daar ’n nuwe Bybelvertaling of geestelike sangbundel verskyn, is dit asof ons teësinnig daaraan proe-proe. Ons wil nie uit ons gemaksone gehaal word nie. Ons is heel tevrede om die status quo van ons geestelike lewe te handhaaf.
God vermaan ons egter om nie moeg te word, uit te sak en lou te wees nie. Ons moet uit ons doodslaap wakker word en met nuwe geestesoë na ou bekende waarhede kyk.
’n Vrou skryf vir my: “In my geestelike lewe het ek onlangs vir die eerste keer bewus geraak van die groot verskil tussen ‘inligting verkry’ en ‘openbaring verkry’. As onderwyseres is dit vir my belangrik om gereeld nuwe inligting in te win of naslaanwerk te doen. Dieselfde het vir my Bybelstudie gegeld. Nou weet ek dat ek eerder daarna moet strewe om die openbaring van God te ontvang as inligting van enige ander bron af.”
Blote inligting kan my ontvanklikheid beperk, my denke begrens. Openbaring breek grense af en transformeer. Dit laat my toe om vryer asem te haal en met nuwe oë te kyk.
Here, vernuwe my denke. Amen.
