Dit gaan goed met elkeen wat die Here dien en sy wil doen … Jou vrou is in jou huis soos ‘n vrugbare wingerdstok, jou seuns is rondom jou tafel soos jong olyfboompies! (Psalm 128:1-3).
Nie lank gelede nie het ek groot plesier gehad aan ʼn radiopraatjie oor RadioSonderGrense.
Dit het oor die uitdagings van die sogenaamde moderne familie gegaan.
Die sielkundige het interessant en uit eie ervaring gepraat. Sy terugkerende oproep, waarmee hy dan ook sy program afgesluit het, was: “Bring terug die tafel! Skakel die TV af.”
Die punt wat hy wou stel, was duidelik. Ons moet daarteen waak dat dinge soos die televisie, en voeg maar die selfoon by, ons familielewe fragmenteer en elkeen in hulle eie kokon of hoek dryf. Sodat ʼn ou gebruik, soos om saam om ʼn tafel aan te sit vir ete, nie verlore gaan nie.
In my kinderjare was die eettafel of kombuistafel die plek vir kuier, vir gesels en soms selfs vir heftige gesprekke oor die nuutste sportgebeure of allerlei brandende politieke kwessies. Die tafel was ook die plek waar ons, dikwels tot laataand, speletjies gespeel en saam na musiek geluister het.
Die sielkundige se pleidooi klink dalk vir baie moderne mense soos ʼn futiele teruggrype na ʼn nostalgiese verlede. Dit is dalk waar, en waarom nie? In ʼn kultuur waar sosiale bande en waardes al hoe meer deur die impak van sosiale media bedreig word, bly sy oproep relevant, indien nie lewensbelangrik nie.
As ek dan by hom kan aansluit: “Bring terug die tafel. Skakel die TV en die selfone af.”
Dankie, Here, vir huise en tafels waar ons vir ete kan aansit en kan saamgesels. Dankie veral vir die belofte dat U ons deurlopend by ʼn feesmaal laat aansit en met u hartlikheid oorlaai. Amen.
Carel Anthonissen
