ʼn Paar Fariseërs uit die skare sê toe vir Jesus: “Meneer, maak stil u volgelinge!” Maar Hy antwoord: “Ek sê vir julle: As hulle stilbly, sal die klippe uitroep” (Lukas 19:39-40).
Onlangs by ʼn vriend se verjaardagpartytjie ontvang die gaste kaartjies met wyshede van die komediant-akteur Charlie Chaplin daarop geskryf.
Tereg merk die persoon langs my aan tafel op: “Ek sou dit nooit kon dink nie. Charlie Chaplin het nogal groot insig gehad.” Inderdaad! Dit was sekerlik een van die uitvloeisels van ʼn ryk en kleurvolle lewe.
Luister net na wat Charlie Chaplin alles op sy dag te sê gehad het:
“We think too much and feel too little.” Ook: “Life is a tragedy when seen in close-up, but a comedy in the long-shot.” En miskien die mooiste: “More than cleverness, we need kindness and gentleness.”
Hierdie laaste wysheid dra ʼn boodskap vir baie mense, veral vir die maghebbers van ons leeftyd wat dikwels met ʼn harde en ongenaakbare hand regeer. Wat glo dat vriendelikheid, bedagsaamheid en sagtheid ʼn swakheid is.
Chaplin se wyshede het my opnuut daarvan bewus gemaak dat die Gees op onverwagte plekke en deur mense van wie ons dit nie altyd verwag nie met ons kan praat.
Laat ons dan ons ore en oë daarvoor oop hou. God kan selfs, in Jesus se woorde, die klippe gebruik om sy boodskap aan ons oor te dra.
Here, dankie vir woorde van wysheid wat dikwels uit onverwagte oorde na ons toe kom. Leer ons om u stem ook daarin te hoor. Amen.
Carel Anthonissen
