Met woorde wat altyd vriendelik en sinvol is, moet julle gereed staan om die regte antwoord vir elke mens te gee – Kolossense 4:6 (Nuwe Lewende Vertaling).
Ek besoek gereeld ’n vrou in ’n versorgingsoord. Ons geselsies draai meestal by gebeure uit die verlede. Wanneer sy van haar middeljarige seun se egskeiding vertel, loop die trane.
“Dis my skuld. Hy moes nooit met haar getrou het nie. Voordat hy haar ontmoet het, het hy ’n verhouding met ’n pragtige meisie gehad. Sy was van ’n ander nasionaliteit en kerkgenootskap. Hy het met my oor hul toekoms gesels, en ek het hom afgeraai om met haar te trou om allerlei probleme te vermy. Hy het die verhouding verbreek, want hy het my raad hoog aangeslaan.”
Nou verwyt sy haarself vir haar seun se mislukte huwelik én lewe, hoewel haar raad opreg was en sy geglo het dit is vir haar kind se beswil. Niemand kan met sekerheid sê hoe die eerste verhouding sou uitgewerk het nie. Sy vergeet ook dat haar seun self ’n keuse in die saak gehad het.
Daar is soveel faktore wat ’n invloed op ons lewe het. Ons kan onmoontlik die skuld aanvaar vir alles wat skeefloop. Ons moet die uitkoms in God se hande laat – solank ons met oortuiging kan sê dat ons Hom in alles raadpleeg en nie ons eie mening as maatstaf gebruik wanneer iemand ons raad vra nie.
Ons moet deurlopend bid en wysheid vra vir alles wat ons pad kruis. God is getrou. Hy sal ons hart voorberei sodat ons met sý wysheid sal antwoord wanneer dit nodig is.
Here, ek smag na u wysheid – nie my eie nie. Amen.
