Julle mag nie afgode dien nie en julle mag nie vir julle afgodsbeelde maak nie. Ek is die Here julle God (Levitikus 19:5).
God se veroordeling van Israel se afgodery by monde van sy profete het my opnuut oor die verskynsel van afgodery laat nadink – waar kom dit vandaan? En hoe dit, net soos in die dae van Israel, steeds bydra tot die verval van ‘n samelewing.
In ‘n sekere sin sal ‘n mens enigiets of iemand wat in die plek van die ware God vereer word as ‘n soort afgod kan sien.
Meesal is afgode God se eie gawes wat skeefgetrek en tot ‘n nuwe vlak en status verhef word. Dáár kry hulle dan ‘n ander betekenis, selfs ‘n eie gestalte, los van die ware God. Hulle word áfgode – nuwe, selfgeskepte gode wat aanbid word as mense se uitsluitlike bron van geluk en sekuriteit.
In Israel se tyd is die Baäls as die gewers van vrugbaarheid en groeikrag vereer. Vandag het ons ander afgode. Hulle is nie so moeilik om te herken nie. Hulle heet, om maar net ‘n paar te noem, geld, kennis, mag en seks.
Hierdie dinge bly steeds gawes van God wat tot heil van ander gebruik of uitgeleef kan word. Los van God word hulle egter gevaarlike magte, afgode wat ons skaamteloos tot gierigheid, leuens, geweld, onreg, promiskuïteit en selfs misdaad kan dryf.
Ai, as elkeen van ons net die afgode in ons eie lewe kon herken en wou teëgaan, sou ons land soveel anders lyk!
Heilige Gees, help ons vandag om die afgode in ons eie lewe raak te sien en in u krag daarteen op te staan. Amen
Carel Anthonissen
