Eendag het hy (Dawid) na sy middagslapie opgestaan en op die dak van sy paleis gaan rondstap. Van die dak af het hy ‘n vrou sien bad. Sy was ‘n baie mooi vrou. Dawid het oor haar navraag laat doen …(2 Samuel 11:2-3).
Die verhaal van Dawid se owerspel met die mooie Batseba bevat verskillende interessante perspektiewe én lesse.
Vir eers – en dit is die algemeenste perspektief – bevat dit ‘n belangrike waarskuwing. Dit is dat selfs die bestes onder ons kan struikel.
Verder ook dat ‘n vroom opvoeding of kennis van die Christelike tradisies en waardes nie noodwendig ‘n vaste waarborg is dat gelowiges nie op ‘n stadium ook hulle kop of oordeelsvermoë kan verloor nie.
Dawid byvoorbeeld was bekend as die geliefde van God. Sy lewe was omring van God se beloftes. Boonop het hy goed geweet wat God van hom as mens en koning verwag het.
En tog, in ‘n ledige oomblik, terwyl sy soldate oorlog gevoer en hy na ‘n genoeglike middagslapie op die dak van sy paleis gaan ronddwaal het, vang sy oog die naakte lyf van die verleidelike Batseba. En net daar skakel sy gewete af en gaan sy morele kompas botstil staan.
Wat hierna volg, is té hartseer en tragies vir woorde. Dit ‘n verhaal wat nie alleen wys hoe ledigheid die duiwel se oorkussing kan word nie, maar ook hoe ‘n gerespekteerde koning tot die vlak van ‘n egbreker en misdadiger kan daal.
Die verhaal roep ons op tot waaksaamheid – ook om nie te gou te oordeel nie. Want die bestes onder ons kan struikel.
O Here, bewaar ons vandag daarvan dat ons na mense met ‘n negatiewe en veroordelende blik kyk. Hou ons bewus van ons eie swakhede en sondes. Amen
Carel Anthonissen
