Hiervan is ek oortuig: geen dood of lewe of engele of bose magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here (Romeine 8:38-39).
Soos ons die periode ná Paasfees inbeweeg, is dit goed om ‘n ruk lank te vertoef by die betekenis van die Paasgebeurtenis vir ons alledaagse lewe.
Die eerste wat opval van die Paasgebeurtenis is die effek van verrassing wat die nuus van Jesus se opstanding op sy navolgers gehad het.
Hierdie verrassing setel nie net in die feit dat hierdie gebeure alle menslike logika en verwagtinge oorstyg het nie. Die eintlike verrassing van Paasfees gaan veel dieper.
Dit lê in die ontdekking dat die Vader van ons Here Jesus Christus nie die Vader van ‘n gebalsemde mummie was nie (Noordmans), maar ‘n Vader wat Jesus in sy groot liefde nooit werklik verlaat of prysgegee het nie. Sodat Jesus nie net die aanslag van die bose, die pyn van onreg en die verskrikking van die dood oorlééf het nie, maar hierdie magte ook oorwin het.
Daarmee het die God van Jesus ‘n magtige teken van hoop en nuwe lewe vir álle mense opgerig. Sodat almal wat in Jesus glo en Hóm navolg, dieselfde liefde en trou van hierdie Vader mag verwag en ervaar.
Dit is ‘n liefde wat, soos Paulus ontdek het, ons nooit los nie, maar bly dra en beskerm, maak nie saak waardeur ons alles gaan nie (Rom 8:35-39).
Here, soos Paulus wil ons vandag roem in u liefde wat ons die oorwinning oor alle magte gee. Help ons om daarin te rus. Amen
Carel Anthonissen
