“Dit is soos u sê: Ek is ‘n koning,” antwoord Jesus (Johannes 18:37).
Ek wonder hoeveel gelowiges besef dat eerskomende Sondag die laaste Sondag van die sogenaamde kerklike jaar is.
En dat dié Sondag boonop bekend staan as die fees van Christus, die koning.
‘n Dag dus waarop Christelike gemeentes regoor die wêreld die unieke en bykans rewolusionêre aard van Christus se koningskap kan herdenk en vier.
Om sinvol hieraan mee te doen, vra – ten minste vir ‘n begin – dat ons in ons gedagtes en voorneme dit sal waag om vandag weer ‘n tree nader aan hierdie besonderse figuur uit die verlede te gee. Miskien selfs, in die woorde van Marcus Borg, bereid is om Hom vir ‘n tweede keer nuut te ontmoet en te leer ken.
Want die meeste van ons weet reeds sedert ons kinderdae goed van hierdie Jesus-figuur. Ons ken sy verhale, sy stories en gesegdes. Maar ken ons Hóm regtig? Ken ons die “Jesus before Christianity” (Albert Nolan), dit wil sê, Jesus soos Hy geleef het voordat die tradisie en ander ideologieë sy beeld en nalatenskap ingekleur en selfs by tye verdraai en verteken het?
Weet ons dat hierdie eenvoudige Jood van Nasaret inderdaad ‘n koning was? Een wat boonop uniek en wonderbaar was!
En dat wie Hom as sodanig erken en volg, ja, deel van sy koninkryk word, se lewe radikaal kan verander?
O Here, gee ons vandag weer die moed en die belangstelling om U beter te leer ken. Amen
Carel Anthonissen
