Op die sewende dag was God reeds klaar met die skeppingswerk en het Hy gerus na al die werk wat Hy gedoen het. Hy het die sewende dag as gereelde rusdag ingestel en dit geheilig … (Genesis 2:2-3).
Sorg dat jy die Sabbatdag heilig hou (Exodus 20:8).
Oor die jare heen het ons baie dinge oor die God van die Bybel gehoor.
Meesal was dit in die aktiewe werkwoordvorm: oor hoe God wérk, skép, hándel, bemoei, liéfde bewys, vergéwe en stráf.
Maar dat God ook kan rus, terugsit, die werk van sy hande in stilte kan betrag en geniet, soos ons in Genesis 2:2-3 verneem, is tog iets besonders, iets waaroor ‘n mens jou kan verwonder.
En nou, in Exodus 20, vra God dieselfde van ons. Of beter gestel: God gun soortgelyke rus aan ons as wat Hy geniet. Stel Hy selfs ‘n dag in waarop ons die rus mag beproef. Want daarsonder, sal ons minder mens wees. Sal die wonder van dinge – van die heelal, die natuur, ander mense en diere, maklik aan ons verbygaan.
Sonder dié rus, sal ons ook nie lus wees of die energie hê om ons werk met oorgawe en toewyding te doen nie. Sal ons dit ook nie geniet nie.
Om te mag rus van ons daaglikse werk, bly ‘n wonderlike gawe én ‘n verpligting.
Here, dankie vandag weer vir die gawe van te rus. Help ons om hierdie gawe nie te verwaarloos nie. Amen
Carel Anthonissen
