“Ek het oor dinge gepraat wat ek nie begryp het nie: u wonderdade was te groot vir my, ek het dit nie verstaan nie” – Job 42:3b
Ann Voskamp vertel in haar boek One thousand gifts van die uitwerking wat haar vierjarige sussie se dood op haar lewe gehad het. Haar geloof in God se liefde en sorg was verpletter.
Sy skryf: “Losses do that. One life-loss can effect the whole of a life. Our sight becomes peppered with black voids. Now everywhere we look, we only see all that isn’t: holes, lack, deficiency.”
Soos Job, het Voskamp God se almag bevraagteken. Toe herinner iemand haar aan koning Hiskia se pleitgebed om langer te lewe, en sy kry nuwe perspektief. God het nog 15 jaar by Hiskia se lewe gevoeg. In daardie tyd is sy seun Manasse gebore, een van die mees goddelose konings wat Israel ooit gehad het.
Haar lewe lank het Voskamp gedink dat sy haar eie storie anders sou geskryf het. Vir die eerste keer het sy nou besef dat sy nie die hele prentjie van haar lewe ken nie. God is die onverklaarbare, die Groot Misterie. Slegs Hy weet hoe alles inmekaarpas en wat die groot doel agter elke lewensgebeurtenis is.
Paulus se aangrypende woorde in Romeine 11:33-36 is ook ons hartsgebed:
O diepte van die rykdom en wysheid en kennis van God! Hoe ondeurgrondelik is sy oordele, hoe onnaspeurlik sy weë! “Wie ken die bedoeling van die Here? Wie gee Hom raad? Wie bewys Hom ’n guns, sodat Hy verplig is om iets terug te doen?” Uit Hom en deur Hom en tot Hom is alle dinge. Aan Hom behoort die heerlikheid tot in ewigheid! Amen.
