Hiérin is God se liefde vir ons geopenbaar: sy enigste Seun het Hy na die wêreld toe gestuur … (1 Johannes 4:9)
Onlangs is die skryfster, Patricia Schonstein, se derde bloemlesing met gedigte oor Afrika gepubliseer.
Dit handel oor die verskillende gestaltes of aspekte van die liefde en heet “Heart of Africa!”
By die bekendstelling van die boek vertel sy interessant oor die ontstaan van hierdie besonderse bundel. Hoe sy ná haar vorige bundel oor oorlog en geweld in Afrika gevoel het om nou te fokus op gedigte wat mensliker en sagter is – soos die liefde.
En tog, so vertel sy, moes sy met die insameling van die eerste gedigte iets ontdek wat sy eintlik reeds geweet het: Die liefde kan ook donker wees, vol teleurstelling, verraad, ontnugtering, spyt en seer.
Gelukkig was dit nie ál wat sy van die liefde gesien of geleer het nie. Want terwyl talle gedigte donker was, was daar ook baie ander wat die tere en helende krag van die liefde belig het. Trouens, dit het geblyk dat die unieke taaiheid en krag van die liefde juis in gebrokenheid, lyding en seer gebore word.
By die lees van haar bloemlesing, kon ek nie anders nie as om te dink aan die lyding van Christus. Want dáár, soos min ander plekke, sien ons die helende en oorwinnende krag van die liefde.
Here, dankie vandag weer vir u liefde, ‘n liefde wat nie gehuiwer het om vir ons te ly nie. Help ons vandag ook daaruit lewe. Amen
Carel Anthonissen
