Hulle het in Kapernaum gekom (Markus 1:21).
Markus 1:21-28 – ons teksgedeelte vir die week – begin met ’n skynbaar onbeduidende uitspraak.
Dit is dat Jesus saam met sy dissipels in Kapernaum aangekom het.
Wie die Evangelies goed lees, sal egter gou agterkom dat Kapernaum ‘n uiters belangrike plek in Jesus se lewe was. Volgens oorlewering was Kapernaum Jesus se stad. Hier het Hy sy eerste dissipels geroep, sy openbare bediening begin en dikwels aan die huis van Petrus vertoef.
In ‘n sin was dit die plek van sy roeping.
En Kapernaum het Jesus nodig gehad. Geleë aan die see van Galilea, was Kapernaum destyds ‘n groot, besige en ryk stad. Maar dit was ook een wat gely het aan die oppervlakkigheid en morele verval wat dikwels gepaard gaan met materiële welvaart en voorspoed. In Jesaja se woorde was Kapernaum, spreekwoordelik gesien, ‘n gebied van groot donkerte en blindheid (Jesaja 8:23-9:1).
En dáár het Jesus nou nuwe lig, hoop en bevryding gebring.
Dié gedeelte herinner ons tereg daaraan dat die plek waar ons woon en werk, belangriker nog, waar ons geroep is om te leef, om ons gawes aan te wend en te dien, nie onbelangrik is nie.
Soos Jesus, is ons geroep om ‘n lig te wees vir hulle wat in donkerte verkeer. Daaraan moet ons óók dink wanneer ons ons woon- en werkplek uitsoek.
Here, wys ons vandag weer die plek waar ons U moet dien. Amen
Carel Anthonissen
