En Samuel sê: “Praat, Here, u dienaar luister!” (1 Samuel 3:10).
Stilte is belangrik, solank dit nie leeg is nie, dit wil sê, aangegryp of misbruik word as ‘n verskoning vir luiheid en ledigheid nie.
Nee, die eintlike waarde van stilte is daarin geleë dat dit ons help om te luister, om ons sintuie, ons oë, maar veral ons ore, te laat opskerp vir alles in en rondom ons.
Op dié manier raak ons méér teenwoordig by alles. Begin ons leef met ‘n verhoogde vorm van bewussyn, ‘n verskerpte sensitiwiteit vir die lewe in al sy kleurryke fasette en nuanses.
Belangriker nog: Stilte help ons om beter en dieper na die stem van God te luister, God se stem wat op baie maniere na ons toe kom: deur die fluisteringe van ons omgewing en die natuur, die optrede van ander, ons eie gewaarwordings, gevoelens en drome ‑ en waarskynlik die belangrikste, ons gewete.
Wie daarin slaag om in stilte goed te luister, se lewe kry ‘n vreemde soort rustigheid, ‘n verskansdheid wat opvallend en voelbaar is.
Dit is dié soort rustigheid wat die beroemde filosoof, Hans-Georg Gadamer, oor sy ewe beroemde tydgenoot, Gerhard von Rad, laat sê het: “There was a silence in him that came out of a deep listening.”
O Here, leer ons vandag weer deur u Gees hoe om in die stilte te luister, hoe om só u eie stem beter te hoor. O Here, hoe verlang ons daarna om U beter te ken. Amen
Carel Anthonissen
