Soos die Vader my liefhet, het Ek julle ook lief. Julle moet in my liefde bly (Johannes 15:9).
In haar boek Secondhand time vertel die Russiese skrywer Svetlana Alexievich – wat in 2015 die Nobelprys gewen het – ʼn buitengewone verhaal.
Dit gaan oor die liefdesverhouding tussen ʼn begaafde musikus, Olga Karimova, en ʼn oudgevangene, Gleb, wat 14 jaar in ʼn strafkamp in Siberië aangehou is.
Op die vraag hoe hy die straflampe oorleef het en, meer nog, hoe hulle verhouding dit kon deurstaan, was Gleb se antwoord:
“My ouers het my van kleins af met liefde omring. Mettertyd het ek geleer: Ons word gedra, indien nie gered nie, deur die hoeveelheid liefde wat ons ontvang. Dit is ons veiligheidsnet. Ja, net die liefde kan ons red. Liefde is die vitamine waarsonder ons nie kan leef nie.”
Gleb se antwoord is ʼn belangrike herinnering, veral vir ons wat in Christus glo. Want sien, in sekere sin was Jesus se hele bediening ʼn onophoudelike poging om die veiligheidsnet van God se liefde onder ons in te skuif. Om ons elke dag met die vitamine van sy liefde te voed.
Sodat ons, net soos Olga en Gleb, kan weet ons lewe is vir tyd en ewigheid in Hom geborge, indien nie onaantasbaar nie.
Hieraan moet jy vashou, al gebeur wat ook al!
O Here, wat ʼn troos om te weet U is met u groot liefde onder ons om ons te vang en te beskerm wanneer ons wankel of val. Amen.
Carel Anthonissen
