Wat julle ook al doen, doen dit van harte soos vir die Here en nie vir mense nie, omdat julle weet dat julle van die Here as beloning sal kry wat Hy belowe het. Christus is die Here in wie se diens julle staan – Kolossense 3:23-24.
Sonder selfdissipline sal dit moeilik wees om iets van blywende waarde te bereik. ’n Bekende akteur vertel van sy voorbereiding vir ’n moeilike rol: “Dit is harde werk, maar dit is goed, want vryheid lê aan die ander kant van dissipline.”
Mark Batterson het tydens die skryfproses van sy boek The circle maker in ’n stadium vasgeval. Hy kon eenvoudig nie dink wat om verder te skryf nie. Die gedagtes en woorde het hom bly ontglip. Sy keel het toegetrek, want die sperdatum was om die draai.
Een oggend het hy by die koffiewinkeltjie ingeloer waar hy gereeld wegneemkoffie gekoop het. Die barista was in gesprek met die koffiekoper voor Batterson in die ry. Hulle het oor sy vorige boek gesels en die klant het vertel dat die boek ’n keerpunt in sy lewe gebring het.
Batterson het met ’n nuwe roepingsbewustheid teruggegaan. Hy het besef dat God se eer op die spel was. Hy sou aan Hom verantwoording moes doen. Daarom het hy elke dag begin met gebed vir goddelike inspirasie en insig, maar veral vir dissipline. En hy het onwrikbaar daarby gehou.
Hy eindig die hoofstuk met die woorde: “Ek het nie die boek geskryf nie; ek het die boek gebid.”
Here, gee my die selfdissipline om alles wat ek doen só te doen asof dit vir U is en nie vir mense nie. Amen.
