Wees mense wat seën omdat julle daartoe geroep is, sodat julle seën as erfdeel kan verkry (1 Petrus 3:9).
Die derde stukkie raad wat die sangeres Joyce DiDonato in 2014 aan studente by die bekende Juilliard-musiekskool in New York gegee het, is waarskynlik die belangrikste.
Dit lui kort en kragtig: “It’s not about you.” Dit gaan nie oor jou nie.
Om dit verder te verduidelik, vervolg sy dan: “Julle besef dit dalk nie nou nie, maar julle het nie bowenal studeer om ʼn lewe van roem en bewondering te geniet nie, hoewel ek van harte hoop dat iets daarvan vir julle almal waar sal word. Feit is, dít is nie julle ware bestemming nie, want roem is tydelik en sal net so vinnig soos dit gekom het weer verbygaan.
“Die waarheid is: Julle het julleself voorberei vir ʼn lewe van diens. En die lewensveranderende gevolge van hierdie diens vir julle en ander mense sal nooit verbygaan soos roem beslis sal nie.”
DiDonato sluit dan haar betoog af met die volgende mooi woorde: “You are here to serve the words, the director, the melody, the author, the chord progression, the choreographer – but above all and most importantly, with every breath, step, and stroke of the keyboard, you are here to serve humanity.”
In Petrus se woorde beteken dit gewoon: Ons is geroep om met ons unieke talente ʼn seën vir ander te wees sodat ons self God se seën as erfdeel kan ontvang.
O Here, hoe sug ons nie na roem en erkenning nie. Leer ons vandag weer die waarde van opregte diens. En herinner ons dat U ons seën wanneer ons ʼn seën vir ander is. Amen.
Carel Anthonissen
