U het my gerou in ʼn koordans verander, my rouklere uitgetrek en my met vreugde omgord (Psalm 30:12).
Oor die waarde en voordele van ʼn gesonde spiritualiteit, of dan ʼn egte en deurleefde geloofslewe, het iemand eenmaal kort en kragtig geskryf:
“It gets you to stop whining. It makes whining the least appropriate response to suffering.” In Afrikaans vertaal: “Dit help jou om op te hou kla. Dit ontmasker ʼn aanhoudende gekla en gesanik as die mins gepaste reaksie op lyding.”
Natuurlik sluit ʼn egte geloofslewe nie uit dat ons soms kan en moet kla nie. Die klaagpsalms en ʼn boek soos Job gee ons juis toestemming daartoe. Maar uiteindelik moet die geestelike krag wat uit ons geloofsvertroue voortspruit ons help om nie in ons klaagliedere vas te val nie.
Ja, om op te hou kla en bokant ons swaarkry en lyding uit te styg.
Sodat ons soos Paulus uiteindelik kan bely dat ook dít ten goede meegewerk het in ons lewe (Rom 8:28). Juis omdat ons daarin, soos Job, die genadige hand van God gesien het (Job 42:4-6). En eerstehands, soos die psalmdigter, ervaar het hoe God ons rou in ʼn koordans verander (Ps 30:12).
So kom ons hou op kla. Daar is beter dinge om te doen!
Here, vergewe ons ons onnodige en voortdurende gekla. Leer ons om bly te wees en U te bly loof, selfs al lyk alles so donker. Amen.
Carel Anthonissen
