Ons bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word (Efesiërs 3:16).
Een van die moeilike vrae in verband met gebed is of ons die skynbaar onmoontlike mag vra.
Soos dat iemand van ‘n siekte, wat medies gesproke ongeneeslik blyk te wees, genees sal word. Of dat God reën sal gee, terwyl die weervoorspelling op die teendeel wys.
Natuurlik kan God wonders laat gebeur. So leer die Bybel ons. God kan onverwagte wendings bring waardeur die wette van die natuur tydelik opgehef word.
Jesus se bediening is vol van sulke voorbeelde.
Tog leer die ervaring ons dat dit dikwels nié so gebeur nie. Dat God skynbaar sake hulle gang laat gaan. Nie die natuurlike orde summier verbreek nie. Per slot van sake hou God die aarde en lewe in stand; bly God Heer van al die wette wat ons lewe daagliks beheer en dra.
En waar hierdie natuurlike orde of harmonie versteur of omver gegooi word soos met ‘n groot natuurramp, of dodelike siektes wat onverwags toeslaan, kom ons voor die misterie van God se onpeilbare raad of voorsiening te staan.
Dan bly die uitdaging om innerlik sterk en gesond te bly. Om steeds sin aan ons terugslae te gee. Steeds moed en krag in ons teleurstellings te vind. Selfs nuwe hoop en geloof daaruit te put.
Hiervoor veral moet ons óók bid. Want om te midde van onbegryplike lyding en teëspoed, innerlik sterk en gelowig te bly, is óók ‘n vorm van genesing.
O Here, ons begryp nie altyd u wil vir ons lewe nie. Nog minder begryp ons die manier waarop U regeer. Maar maak ons vandag weer innerlik sterk, gee ons daardie heling wat van ons lyding sin maak. Amen
Carel Anthonissen
