Stralende oë bring blydskap, goeie tyding verkwik ‘n mens (Spreuke 15:30).
Byna elke mens het iets waarvoor hulle bekend staan.
Dit is daardie een eienskap of kenmerk wat onmiddellik uitstaan of na vore tree wanneer jy aan hulle dink.
By party is dit hulle intelligensie, veelsydigheid, die vermoë om vlot te praat of gemaklik met ander om te gaan.
Ander weer word onthou vir hulle rigiditeit, slegte humeur of ongeduld.
Nog ander weer vir hulle gasvryheid, spontaneïteit en vriendelike geaardheid.
Allie was so ‘n oop, hartlike mens. Voor jy hom nog gesien het, het jy sy vriendelike stem agter jou hoor groet, terwyl hy verby jou gery het. En soos ‘n goeie tyding was daar altyd sáám met sy glimlaggende gesig en stralende oë die spontane en innige wuif.
Allie het my destyds, toe ek nog ‘n jong onervare en selfbewuste leraar was, die waarde van egte vriendelikheid geleer. En dat dit bitter min kos of vra. Alleen maar ‘n klein moedige gebaar of treetjie waardeur jy jou omgewing en die mense wat daar vertoef, ‘n hele dag lank, indien nie ‘n leeftyd lank nie, kan opvrolik.
Dus, waarheen is jy nou op pad? Wie gaan jy sien? Met wie gaan jy praat?
Onthou tog om vriendelik te wees. Dit kos amper niks nie. Maar dit kan die wêreld ‘n mensliker en leefbaarder plek help maak.
Here, leer ons vandag weer die waarde van ‘n vriendelike gesig of glimlag. Amen
Carel Anthonissen
