Probeer liewer wysheid bekom as goud, liewer insig as silwer (Spreuke 16:16).
Oor wyse keuses wat ons lewe mensliker en gelukkiger kan maak, het die Katolieke skrywer, Henri Nouwen, belangrike raad gegee.
In sy boek “Journey to Daybreak”, skryf hy op ‘n plek: “Put aside what is urgent and tend to what is important.”
Nouwen het dit in sy skrywe gewis oor die moderne mens se lewe. Dit is ‘n lewe waarin geld die groot dryfveer en bestemming geword het. En die horlosie die daaglikse wysvinger wat die pas, ritme, en selfs aard, van lewe bepaal.
Hierdie vinger bewaak die ingang en uitgang van ons dag. Dit wek ons uit ons slaap, jaag ons uit die bed, laat ons aansit vir ontbyt, dwing ons die verkeer in en plaas ons op pad werk toe.
Later, as die son gesak het, herinner dit ons aan ‘n tyd van terugkeer.
En so gaan ons tyd op in die oënskynlike dringende: Om van vroeg tot laat e-posse te beantwoord, nóg ‘n afspraak in te pas, nóg ‘n verslag te skryf, nóg ‘n reis te onderneem, ja, selfs die verpligte gimnasiumsessie oor middagete na te kom.
Sodat ons môre nóg sterker en fikser kan wees vir die eise van ‘n nuwe dag.
Tereg merk een van ons voorste skrywers op: “Ons is vandag letterlik vasgevang en ingehok (ge-‘inbox’) in die vensters van ons rekenaar.”
En só raak ons prioriteite deurmekaar en bly ‘n klomp belangrike dinge in die slag. Dinge soos ons gesin, vriendskappe, ons eie kreatiwiteit en stokperdjies, die natuur, musiek, stiltetye, studie, lees, geloof, God.
Dit is omdat ons lewe só lyk dat Nouwen ons daaraan herinner: “Skuif ‘n slag dit wat so dringend lyk opsy en draai na die werklik belangrike dinge in jou lewe.”
Jy weet baie goed wat hulle is.
Here, gee ons vandag daardie wysheid wat kan onderskei tussen wat dringend lyk, maar nie so noodsaaklik is nie, en dit wat régtig belangrik is. Amen
Carel Anthonissen
