Dit sal goed gaan met die mens wat na my luister, die mens wat elke dag na my huis toe kom en op die drumpel staan en wag – Spreuke 8:34.
In Afrikaans is daar verskeie uitdrukkings waarin die woord “drumpel” voorkom: Op die drumpel van ’n groot avontuur. Op die drumpel van sukses. Op die drumpel van die lewe.
Ons voel die afwagting van iets groots wat gaan gebeur. Daar wag ’n nuwe avontuur of fase. Wanneer jy oor die drumpel getree het, laat jy sekere dinge agter. ’n Bruidegom dra sy bruid simbolies oor die drumpel van hul eerste blyplek. Dit is die begin van ’n nuwe lewe saam. In Spreuke 8 teken Salomo ’n prentjie van iemand wat toegewyd by die drumpel van ’n huis staan en wag om toegelaat te word. Hy wag met vreugde, met blye afwagting. Hy is geduldig, want hy weet dat dít waarop hy wag, vir hom ’n nuwe toekoms gaan oopmaak.
In die 1933/1953-vertaling klink Spreuke 8:34-35 só: “Gelukkig is die mens wat na my luister, om dag vir dag te waak aan my deure, by die syposte van my poorte die wag te hou. Want hy wat my [die wysheid] vind, het die lewe gevind en verkry ’n welbehae van die Here.”
In Psalm 84:11 weerklink dieselfde blye afwagting: “Waarlik, één dag in u tempel is beter as duisend daarbuite. Ek staan liewer by die drumpel van die huis van my God as om te woon in huise sonder God.”
Here, ek wil op die drumpel van u woning vertoef, want ek weet dat ek nét by U ware wysheid kan vind. Amen.
